ថ្មីៗនេះរឿងអាស្រូវពុករលួយ បក្សពួកនិយម និងទង្វើមិនប្រក្រតីរបស់លោកឧត្តមសេនីយ៍ទោ កឹង ឃន ស្នងការនគរបាលខេត្តស្វាយរៀង ត្រូវបានមន្ត្រីនគរបាលក្រោមឱវាទសុំមិនបញ្ចេញឈ្មោះនៅក្នុងស្នងការដ្ឋាននគរបាលខេត្តស្វាយរៀង បានប្រាប់អ្នកសារព័ត៌មានយើងអោយដឹងពីរឿងអាស្រូវពុករលួយ បក្សពួកនិយមរបស់លោក កឹង ឃន គឺដើម្បីឲ្យថ្នាក់ដឹកនាំក្រសួងមហាផ្ទៃ ក៏ដូចជានាយឧត្តមសេនីយ៍ នេត សាវឿន អគ្គស្នងការនគរបាលជាតិ បានជ្រូតជ្រាបហើយនឹងចាត់វិធានការណ៍ទប់ស្កាត់នូវអំពើពុករលួយរបស់លោក កឹង ឃន ខ្លះផង។ ទន្ទឹមនឹងនេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ក៏គួរបើកការស៊ើបអង្កេតជុំវិញរឿងអាស្រូវពុករលួយរបស់លោក កឹង ឃន ស្នងការនគរបាលខេត្តស្វាយរៀង និងបក្សពួកឲ្យបានស៊ីជម្រៅផងដែរ។
បើតាមប្រភពពីមន្ត្រីនគរបាលនៅក្នុងស្នងការដ្ឋាននគរបាលខេត្តសា្វយរៀង បានឲ្យដឹងថាលោក កឹង ឃន រំលោភអំណាច ប្រព្រឹត្តអំពើពុករលួយ ទទួលសំណូកពីឈ្មួញវៀតណាមហើយអនុញ្ញាតឲ្យឈ្មួញនាំទំនិញចូលតាមច្រករបៀងចំនួន៩កន្លែងនៅតំបន់ព្រំដែនខ្មែរ-វៀតណាម ។ ប្រភពបានឲ្យដឹងទៀតថាក្នុងតួនាទីជាស្នងការនគរបាលខេត្តស្វាយរៀង ជាច្រើនឆ្នាំមកនេះលោក កឹង ឃន បានបញ្ជូនសាច់ញាតិនិងបក្សពួករបស់ខ្លួនឲ្យទៅគ្រប់គ្រងតាមច្រករបៀងច្រើនកន្លែងដើម្បីប្រមូលលុយពីឈ្មួញដែលនាំចូលទំនិញខូចគុណភាពដោយគ្មានការត្រួតពិនិត្យពីសំណាក់មន្ត្រីជំនាញនិងសមត្ថកិច្ចពាក់ព័ន្ធឡើយ ។ ដូច្នេះហើយទើបមន្ត្រីនគរបាលខេត្តស្វាយរៀង បានអំពាវនាវឲ្យថ្នាក់ដឹកនាំក្រសួងមហាផ្ទៃ និងអង្គភាពប្រឆាំងអំពើពុករលួយ បើកការស៊ើបអង្កេតទៅលើរឿងអាស្រូវពុករលួយបក្សពួកនិយមរបស់លោក កឹង ឃន ស្នងការនគរបាលខេត្តស្វាយរៀង ជាបន្ទាន់។
ប្រភពដែលស្និទ្ធនឹងលោក កឹង ឃន សុំមិនបញ្ចេញឈ្មោះបានឲ្យដឹងថា រយៈពេលច្រើនឆ្នាំមកនេះលោក កឹង ឃន និងបក្សពួកសាច់ញាតិឃុបឃិតគ្នាប្រព្រឹត្តអំពើពុករលួយយ៉ាងសុខស្រួលដោយក្នុងទំនិញដែលឈ្មួញនាំចូលតាមច្រករបៀងនិមួយៗក្នុងមួយរថយន្តត្រូវបង់ចាប់ពី២៥ម៉ឺនទៅដល់៦០ម៉ឺនរៀល ហើយទំនិញខ្លះត្រូវបង់លុយមួយរថយន្តពី១០០ដល់១៥០ដុល្លារ។ គ្រប់ច្រករបៀងដែលឈ្មួញនាំចូលទំនិញគេចពន្ធ និងទំនិញខុសច្បាប់សុទ្ធតែគ្រប់គ្រងដោយសាច់ញាតិនិងបក្សពួករបស់លោក កឹង ឃន ទាំងអស់ហើយលោក កឹង ឃន គាបសង្កត់លើស្នងការរងនគរបាលខេត្តស្វាយរៀង ជាច្រើននាក់ទៀតយ៉ាងកំរោល។ ប្រភពបានឲ្យដឹងទៀតថា ច្រកព្រំដែនសំខាន់ៗដូចជា ច្រកសំរោង ស្រុកចន្ទ្រា គឺលោក កឹង ឃន អាចប្រមូលចំណូលក្នុងមួយយប់ៗមិនក្រោមពីមួយម៉ឺនដុល្លារនោះទេ ហើយច្រកព្រំដែនបុស្សមន ស្រុករំដួល ខេត្តស្វាយរៀង ក៏លោក កឹង ឃន ប្រមូលចំណូលក្នុងមួយយប់ៗមិនតិចជាងមួយម៉ឺនដុល្លារនោះដែរ។ បើតាមការបង្ហើបពីមន្ត្រីនគរបាលនៅក្នុងស្នងការដ្ឋាននគរបាលខេត្តស្វាយរៀង បានឲ្យដឹងទៀតថា ការដែលលោក កឹង ឃន ហ៊ានធ្វើអ្វីៗតាមអំពើចិត្តគឺអាងមានខ្នងបង្អែកដ៏រឹងមាំនៅក្នុងក្រសួងមហាផ្ទៃ ដូច្នេះហើយទើបលោក កឹង ឃន ហ៑ានប្រព្រឹត្តអំពើពុករលួយយ៉ាងគឃ្លើនបែបនេះ៕ សារព័ត៌មានយើងមិនអាចសុំការបំភ្លឺពីលោក កឹង ឃន បានទេដោយសារគ្មានលេខទូរសព្ទ អង្គភាពសារព័ត៌មានយើងរុងចាំទទួលនូវការបកស្រាយបំភ្លឺពីភាគីដែលពាក់ព័ន្ធគ្រប់ម៉ោងធ្វើការ ។ 088 4777 854
0
លោក កឹង ឃន ស្នងការនគរបាលខេត្តស្វាយរៀងនឹងបក្សពួកកំពុងប្រព្រឹត្តអំពើពុករលួយ៖ ថ្ងៃអាទិត្យ១២កើតខែផល្គុនឆ្នាំចសំរិទ្ធិស័កព.ស ២៥៦២ ត្រូវនឹងថ្ងៃទី១៧មិនា២០១៩ ៖
Filed in: ព័ត៌មានថ្មីៗ, រាយការណ៍ពិសេស
