ប្រជាពលរដ្ឋនៅសង្កាត់ព្រៃស និងសង្កាត់ព្រៃវែង ខណ្ឌដង្កោនិងមានទឹកស្អាតប្រើប្រាស់ក្នុងពេលឆាប់ៗ

ភ្នំពេញ៖ ប្រជាពលរដ្ឋនៅភូមិមួយចំនួនក្នុងសង្កាត់ព្រៃស និងសង្កាត់ព្រៃវែងបានសម្តែងក្តីសប្បាយចិត្តយ៉ាងខ្លាំង ខណៈដែលពួកគាត់ទទួលដំណឹងថានឹងទទួលបានទឹកស្អាតចូលភូមិដល់ផ្ទះសំរាប់ប្រើប្រាស់នៅក្នុងពេលឆាប់ៗខាងមុខ ដែលជាការយកចិត្តទុកដាក់តាមរយៈអាជ្ញាធរខណ្ឌដង្កោ និងជាពិសេសតាមការស្នើសុំទៅរដ្ឋាករទឹកស្វយត័តាមរយៈអភិបាលរាជធានីភ្នំពេញ។

នៅព្រឹកថ្ងៃទី១៦ ខែកក្កដា ឆ្នាំ២០១៩នេះ លោក នុត ពុធដារ៉ា អភិបាល នៃគណៈអភិបាលខណ្ឌដង្កោ និងជាជំនួយការសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចុះជួបសំណេះសំណាលជាមួយបងប្អូនពលរដ្ឋភូមិត្រពាំងចក សង្កាត់ព្រៃ ដើម្បីផ្សព្វផ្សាយនិងជូនដំណឹងដល់ពលរដ្ឋពីការតភ្ជាប់បណ្តាញទឹកស្អាត ដែលជាការគិតគូរបំផុតរបស់រាជរដ្ឋាភិបាល ក៏ដូចជាការគិតគូរដោយផ្ទាល់របស់សាលារាជធានីភ្នំពេញ។ ប្រជាពលរដ្ឋបានសាទរយ៉ាងខ្លាំងខណៈដែលពួកគាត់ទទួលបានដំណឹងដ៏ល្អមួយនេះ។

អភិបាលខណ្ឌដង្កោ លោក នុត ពុធដារ៉ា ក៏បានណែនាំដល់ពលរដ្ឋចៀសឲ្យឆ្ងាយពីគ្រឿងញៀន និងល្បែងស៊ីសងខុសច្បាប់ ព្រោះថានេះជាការខុសច្បាប់ក្នុងសង្គម ហើយសមត្ថកិច្ចចុះចាប់បង្ក្រាបនាំឲ្យមានការលំបាក់ក្នុងជីវភាព ប៉ះពាល់ដល់អារម្មណ៍កូនៗរៀនមិនចេះ និងមានអំពើហឹង្សាក្នុងគ្រួសារដោយសារតែល្បែងស៊ីងសងនេះ។ បញ្ហាគ្រឿងញៀនក៏ជារឿងធំបំផុត ដែលពលរដ្ឋយើងមិនត្រូវចង់ដឹង ឬសាកមើលអីទេ វានាំឲ្យខូចអានាគតកូនចៅរបស់យើង ហើយបើមានអ្នកសេពគ្រឿងញៀន អ្នកចែកចាយជួញដូរត្រូវរាយការណ៍ដល់សមត្ថកិច្ចដើម្បីចុះមកបង្ក្រាបតែម្តង។

លោក នុត ពុធដារ៉ា អភិបាល នៃគណៈអភិបាលខណ្ឌដង្កោបន្តថា ទាល់តែយើងទាំងអស់គ្នាចូលរួមសហការ នឹងផ្តល់ព័ត៌មានដល់អាជ្ញាធរទើបយើងអាចបំបាត់អំពើលួច ឆក់ ប្លន់ និងគ្រឿងញៀននេះបាន មិនអាចអត់បងប្អូនពលរដ្ឋយើងបានទេ។

លោកអភិបាលខណ្ឌដង្កោដ៏ដែលក៏បានក្រើនរំលឹកដល់នគរបាលប៉ុសិ៍តរដ្ឋបាលត្រូវយកចិត្តទុកដាក់ក្នុងការបង្ក្រាបបទល្មើសលួច ឆក់ និងល្បែងស៊ីសងនៅក្នុងភូមិទួលសំបូរ ដែលលោក អភិបាលទទួលដំណឹងថា កើតមានករណីខាងលើនេះយ៉ាងខ្លាំង៕